पाठ ४: व्यावसायिक पत्र (नेपाली कक्षा १२)

पाठ ४: व्यावसायिक पत्र (नेपाली कक्षा १२)

(toc)

पाठ

कर्नाली उत्पादन तथा वितरण केन्द्र

चिसापानी, कैलाली

मिति: २०७८/०१/०२

प.स. 

च.नं.

श्रीमान् प्रमुख

ज्वालामाई उपभोग्य वस्तु सङ्कलन तथा वितरण कम्पनी 

कोहलपुर, बाँके ।

विषय: आपूर्ति सम्झौता सम्बन्धमा ।

त्यस कम्पनीको मिति २०७७/१२/२५ को पत्र प्राप्त भई पत्रको व्यहोरा अवगत भयो । यस कम्पनीबाट उत्पादित तथा सङ्कलित वस्तुको बिक्री वितरण गर्ने र दुई कम्पनीका बिचमा सहकार्य गर्ने भनी त्यस कम्पनीले राखेको प्रस्तावलाई यो कम्पनी सहर्ष स्वीकार गर्छ । यस कम्पनीले विगतका दिनमा अन्य धेरै कम्पनीसँग सहकार्य गरिसकेको छ र त्यसबाट दुवै पक्ष लाभान्वित पनि भएका छन् । त्यसैले आगामी दिनमा अन्य कम्पनीसँग झैँ त्यस कम्पनीसँग पनि सुमधुर वातावरणमा सहयोग आदानप्रदान हुने अपेक्षाका साथ यथाशीघ्र सम्झौता गरी काम अघि बढाउनसमेत यो कम्पनी अनुरोध गर्छ । यस कम्पनीबाट उपलब्ध हुने वस्तुहरूको विस्तृत विवरण र मूल्यसूची हाम्रो वेबसाइटमा उपलब्ध छ । यस कम्पनीबाट उत्पादित तथा सङ्कलित सामानको विवरण यसप्रकार रहेको छ:

१. चामल, मकै, भटमास, दाल, आलु, तरकारी, फलफूल

२. माछा, खसी, भेडा, कुखुरा हाँस, खरायो, गाई, भैँसी, बाख्रा, घोडा 

३. दुध, दही, घिउ, चिज

४. विभिन्न किसिमका बिउ, बिजन 

५. फर्निचर तथा विभिन्न किसिमका घरेलु सामान

भावना चौधरी

प्रबन्ध निर्देशक

शब्दभण्डार

१. शब्द र अर्थको जोडा मिलाउनुहोस्:

शब्द                 अर्थ

प्रबन्ध                दुई वा दुईभन्दा बढी व्यक्ति वा संस्थाले मिलेर गरिने काम 

अवगत              खुसीसाथ, खुसीले युक्त 

दीर्घकालीन        बन्दोबस्त, चाँजोपाँजो

सङ्कलित            बेखुसी

वितरण             लामो समय

सहकार्य            जतिसक्दो चाँडो 

प्रस्ताव              बटुलिएको

यथाशीघ्र           बाँडफाँड

                        कुनै कामको आरम्भ वा सम्पादनका लागि प्रस्तुत गरिएको विचार 

                        जानेको वा बुझेको 

उत्तर:

प्रबन्ध - बन्दोस्त, चाँजोपाँजो
अवगत - जानेको छ बुझेको
दीर्घलीन - लामो समय
संकलित - बटुलिएको
वितरण - बाँडफाँड
सहकार्य - दुई वा दुईभन्दा बढी व्याक्ति वा संस्थाले मिलेर गरिने काम
प्रस्ताव - कुनै कामना आरम्भ वा सम्पादनका लागि प्रस्तुत गरिएको बिचार

यथाशीघ्र - जतिसक्दो चाँडो

२. दिइएका शब्दको विपरीतार्थक शब्द लेख्नुहोस्:

हार, दाहिने, रुनु, आफ्नो, दिन, आय, सक्कली, निराशा, प्रतिकूल, जस, प्रेम, आकर्षण, जटिल, सबल, सापेक्ष, हर्ष, सपना, अनावश्यक (alert-error)

उत्तर:

हार - जित
दाहिने - देब्रे
रुनु - हाँस्नु
आफ्नो - अर्काको
दिन - रात
आय - व्यय
सक्कली - नक्कली
निराशा - आशा
प्रतिकूल - अनुकुल
जस - अपजस
प्रेम - घृणा
आकर्षण - विकर्षण
जटिल - सरल
सबस - दुर्बल
सपेक्ष - निरपेक्ष
हर्ष - विस्मात
सपना - विपना

अनावश्यक - आवश्यक

३. तलका शब्दको लघुतावाचक शब्द लेख्नुहोस्:

(क) किरो, कोदालो, गाग्रो, चिम्टा, चरो, थाल, ठेको, पुस्तक

किरो - किरी
कोदालो - कोदाली
गाग्रो - गाग्री
चिम्टा - चिम्टी
चरो - चरी
थाल - थाली
ठेको - ठेकी

पुस्तक - पुस्तिका पाना

(ख) रोटी, सुन्तला, भात, पराल, पानी, फूल, केरा

रोटी - टुक्रा
सुन्तला - केस्रो
भात - सिता
पराल - त्यान्दो
पानी - थोपा
फूल- पत्र वा दल

केरा - कोसो

बोध र अभिव्यक्ति

१. पाठका आधारमा दिइएका प्रश्नको उत्तर भन्नुहोस् :

(क) व्यावसायिक चिठीको सबैभन्दा माथि के लेखिन्छ ?

उत्तरः व्यावसायिक चिठीको सबैभन्दा माथि चिठी लेख्ने प्रेषकको व्यावसायिक संस्थान वा कार्यालयको नाम र ठेगाना लेखिन्छ ।

(ख) व्यावसायिक चिठीमा पत्र सङ्ख्या र चलानी नम्बर कहाँ लेखिन्छ ?

उत्तरः व्यावसायिक चिठीमा पत्र सङ्ख्या र चलानी नम्बर प्रेषकको व्यावसायिक संस्थान वा कार्यालयको नाम र ठेगानाभन्दा मुनि देब्रेपटि मितिभन्दा तल्लो लाइनमा लेखिन्छ ।

(ग) व्यावसायिक चिठीको कुन भागमा कहाँनेर मिति लेखिन्छ ?

उत्तरः व्यावसायिक चिठीको अग्र भागमा प्रेषकको व्यावसायिक संस्थान वा कार्यालयको नाम र ठेगानाभन्दा एक लाइन तलतिर दाहिनेपट्टिको भागमा मिति लेखिन्छ ।

(घ) व्यावसायिक चिठीमा सम्बोधन र विषयको रखाइक्रम कस्तो हुन्छ ?

उत्तरः व्यावसायिक चिठीमा अग्र भागको देब्रेपट्टि पत्र सङ्ख्या र चलानी नम्बरको मुन्तिर पहिला सम्बोधन र ठेगाना अनि तल्लो लाइनको केन्द्र भागमा विषयको रखाइक्रम हुन्छ ।

२. पाठमा उल्लेख भएअनुसार ज्वालामाई उपभोग्य वस्तु सङ्कलन तथा वितरण कम्पनी कोहलपुर, बाँकेले कर्नाली उत्पादन तथा वितरण केन्द्र चिसापानी, कैलालीलाई मिति २०७७/१२/२५ मा लेखेको पत्र कस्तो हुनसक्छ, अनुमान गरी लेख्नुहोस् ।

उत्तर:

ज्वालामाई उपभोग्य वस्तु सङ्कलन तथा वितरण कम्पनी

कोहलपुर, बाँके

मिति: २०७७/१२/२५

प.स.: ०७७/०७८

च.नं.: ६६/०७७

श्रीमान् प्रबन्ध निर्देशक,

कर्नाली तथा वितरण केन्द्र

चिसापानी, कैलाली ।

विषय : आपूर्ति सम्झौता एवं सहकार्य सम्बन्धमा ।

महोदय, 

उपरोक्त सम्बन्धमा यस ज्वालामाई उपभोग्य वस्तु सकलन तथा वितरण कम्पनीले विगत पाँच बर्षदेखि विभिन्न कम्पनीद्वारा उत्पादित दैनिक उपभोग्य सामग्रीहरू एवं विभिन्न वस्तुहरू सङ्कलन गरी छिटो छरितो र प्रभावकारी रूपमा थोक तथा खुद्रा विक्री वितरण गर्दै आइरहेको तथ्य तपाईलाई पनि अवगत नै छ होला । उपभोक्ताहरूको माग दिनप्रतिदिन बढ्दै गएकाले त्यस कम्पनीबाट उत्पादित अर्गानिक खाद्यपदार्थ एवं विभिन्न उपभोग्य वस्तुहरुको बिक्री वितरण गर्नका लागि हाम्रो कम्पनी इच्छुक रहेको अबगत गराउँदै दुई कम्पनीका बिचमा व्यापारिक सहकार्य गर्ने प्रस्ताव राख्दछु । दुई कम्पनीका बिच सम्बन्ध गास्नका लागि यथाशीघ्र कम्पनीले पहल गर्ने छ भन्ने अपेक्षा राख्दै त्यस कम्पनीबाट उपलब्ध हुने उत्पादित एवं सङ्कलित वस्तुहरूको विस्तृत विवरण र मूल्यसूचीसमेत उपलब्ध गराई सहयोग गरिदिनुहुन हार्दिक अनरोध गर्दछ । सहयोगका लागि धन्यवाद ।

भवदीय

.....................

नन्दिता क्षेत्री

(कम्पनी प्रमुख)

खामको नमूना

३. हालसालै प्रकाशित पुस्तक पठाइदिन भनी तपाईँको घरनजिकै रहेको पुस्तक पसलले नेपाल प्रज्ञा प्रतिष्ठान, कमलादी, काठमाडौँलाई लेख्ने पत्रको नमुना तयार पार्नुहोस् । 

उत्तर:

सम्झना पुस्तक पसल

वालिङ-४, स्याङ्जा

गण्डकी, प्रदेश नेपाल

मिति : २०७८/१०/१९

प.स. : ०७८/०७९

च.नं. : ७२/०७८

श्रीमान् प्रबन्ध निर्देशक,

नेपाल प्रज्ञा प्रतिष्ठान,

कमलादी, काठमाडौं ।

विषय: सन्दर्भ पुस्तकहरू उपलब्ध गराइदिने सम्बन्धमा ।

महोदय,

उपरोक्त विषयका सम्बन्धमा यस सम्झना पुस्तक पसलले विगत दुई दशकदेखि नेपाल प्रज्ञा प्रतिष्ठानबाट प्रकाशित पुस्तकहरू विक्री वितरण गर्दै आइरहेको कुरा यहाँलाई अवगत नै छ । प्रतिष्ठानबाट प्रकाशित हुने पुस्तकहरू यस क्षेत्रका पाठकहरूका बिचमा निकै नै लोकप्रिय एवं रूचिकर बन्ने गरेको हुनाले पाठक वर्गको अत्यधिक मागलाई मध्यनजर राख्दै नेपाल प्रज्ञा प्रतिष्ठानबाट हालसालै प्रकाशित सन्दर्भ पुस्तकहरू तपसिलमा माग गरिएको विवरणअनुसार यथाशीघ्र पठाइदिनुहुन अनुरोध गरिन्छ ।

तपसिल

• गोर्खाली युद्धबन्दीका लोकभाका र कथा - ५० थान
• समकालीन नेपाली कथाका वैचारिकता - ५० थान
• सेतो धरती - ५० थान
• श्वेतभैरवी - ५० थान
• नेपालमा बुद्ध धर्म - ५० थान
• तीन घुम्ती - ५० थान

उल्लिखित पुस्तकहरूको भुक्तानीका लागि त्यस प्रतिष्ठानको नाममा रहेको राष्ट्रिय बाणिज्य बैङ्कको खाता नं. २०८०००****०१ मा पेस्की स्वरूप रू. ३००००/- (अक्षरेपि तिस हजार रूपियाँ मात्र) जम्मा गरेको बैक भौचर यसै पत्रसाथ पठाएको छु । बाँकी रकम पुस्तकहरूका साथै बिल प्राप्त हुनासाथ भुक्तानी गरिने व्यहोरा अनुरोध गर्दछु । सहयोगका लागि धन्यवाद !

भवदीय

....................

प्रो. सम्झना क्षेत्री

खामको नमूना

४. दिइएको चिठी पढ्नुहोस् र सोधिएका प्रश्नको उत्तर लेख्नुहोस् :

मिति: २०७८/०२/०५

सङ्खुवासभा

आदरणीय दाजु

सादर प्रणाम !

हामी यहाँ सबै जना आराम छौँ र तपाईँ पनि आरामै हुनुहुन्छ भन्ने आशा र विश्वास लिएका छौँ । तपाईँले चिठीमा गाउँघरको खबरबारे चासो राख्नुभएको रहेछ । त्यही विषयमा यो चिठी लेख्दै छु ।

दाजु, गाउँमा कृषि जागरण सुरु भएको छ । गाउँमै बसेर पनि मनग्गे आम्दानी गर्न सकिने रहेछ भन्ने पुष्टि भएको छ । हेर्नुहोस् न, जगराम काकाले बाख्रापालन र तरकारी खेतीबाटै यस वर्ष दश लाख आम्दानी गर्नुभयो । हामीले पनि गोलभेँडा, कुखुरा र खसी बेचेर तीन लाख कमायौँ । हामीले कटहरे पाखाभरि अलैँचीका बिरुवा रोपेका छौँ, पल्लो खोरियामा बोधिचित्त र रुद्राक्षका बिरुवा लगाएका छौँ । चारओटै टनेलमा राम्रोसँग गोलभेँडा फलिरहेका छन् । आजभोलि गाउँमा भुइँ स्याउ, ड्रागन, घिउफल, किबी जस्ता नयाँ प्रजातिका फलफूल खेती गर्ने चलन आएको छ । हामीले पनि तल्लो बिरौटामा यी फलफूल लगाएका छौँ । कोरोना भाइरसको महामारीसँगै धेरै युवा गाउँ फर्किंदै छन् । कृषिमा आधुनिकीकरण र व्यावसायीकरणको सुरुआत भएको छ । कृषिजन्य उद्योग खुल्न थालेका छन् । गाउँमा डेरी, जुस, चिज, फर्निचर, राडीपाखी, अल्लो तथा खाँडीका कपडा आदिका उद्योग खुलेका छन् । व्यवस्थित रूपमा माछापालन, मौरीपालन, बाख्रापालन, तरकारी खेती, रेसम खेती, भेडापालन, बङ्गुरपालन आदिको सुरुआत भएको छ । गाउँमा विकासका काम पनि धमाधम हुँदै छन् । सडक, कुलो, बिजुली बत्ती, खानेपानीका काम भइरहेका छन् । हाम्रो गाउँदेखि विराटनगर र काठमाडौँका लागि दिवा तथा रात्रि सेवाको बस सञ्चालन भएका छन् । गाउँको उत्पादन सजिलै सहर बजारमा पुग्न थालेको छ ।

दाजु, अब पैसा कमाउनका लागि विदेशमा बस्नु पर्दैन । त्यसैले चाँडै गाउँ फर्किनुहुन्छ भन्ने आशा छ । 

उही तपाईँकी प्यारी बहिनी

सुनिता दङ्गाल

क) गाउँमा के सुरू भएको छ ?

उत्तरः गाउँमा कृषि जागरण सुरू भएको छ ।

(ख) जगराम काकाले कसरी आम्दानी गर्नुभयो ?

उत्तरः जगराम काकाले बाख्रापालन र तरकारी खेती गरेर आम्दानी गर्नुभयो ।

ग) कोरोना भाइरसको महामारीपछि गाउँमा कस्तो परिवर्तन भएको छ ?

उत्तरः कोरोना भाइरसको महामारीपछि धेरै युवा गाउँ फर्केर कृषि पेशामा आबद्ध भई कृषिमा आधुनिकीकरण र व्यावसायीकरणको सुरुआत गर्नुका साथै विकासका कामहरूसमेत धमाधम भएको छ ।

(घ) कृषिमा आधुनिकीकरण र व्यावसायिकीकरण भनेको के हो, स्पष्ट पार्नुहोस् ।

उत्तरः आधुनिक यन्त्रको प्रयोग गरी कृषिलाई नै मुख्य व्यवसायको रूपमा विस्तार गर्नु नै कृषिमा नै आधुनिकीकरण र व्यावसायिकीकरण हो ।

(ङ) माथिको चिठीको प्रापक र प्रेषकको नाम ठेगाना अनुमान गरी खामको नमुना बनाउनुहोस् ।

उत्तरः

खामको नमूना

५. दिइएको कार्यालयीय चिठी पढ्नुहोस् र त्यसको प्रत्युत्तर लेख्नुहोस् ।

मिति : २०७८/०२/०७

पाठ्यक्रम विकास केन्द्र,

सानोठिमी, भक्तपुर

प. स. 

च. न. 

विषय : सहभागिता सम्बन्धमा 

श्री नेचासल्यान गाउँपालिका सोलुखुम्बु । यस केन्द्रले स्थानीय तहसँगको सहकार्यमा विद्यालय पाठ्यक्रम तथा पाठ्पुस्तकसम्बन्धी अभिमुखीकरण प्रशिक्षण, तालिम, गोष्ठी, अन्तरव्रिmया आदि सञ्चालन गर्दै आएको छ । विभिन्न जिल्लाका १०० भन्दा बढी स्थानीय तहसँगको सहकार्यमा यस्ता कार्यक्रम सम्पन्न भइसकेका छन् । उपत्यकाका विभिन्न नगरपालिका र गाउँपालिकामा पनि यस्ता कार्यक्रम सम्पन्न भएका छन् । ती कार्यक्रम शिक्षण सिकाइका लागि उपलब्धिमूलक रहेको भन्ने प्रतिक्रिया पनि प्राप्त भइरहेको छ । अतः त्यस गाउँपालिकामा पनि यस्ता कार्यक्रम सञ्चालन गर्न आवश्यक भएमा जानकारी गराइदिनु हुन अनुरोध छ । कार्यक्रमको प्रकृति र सहभागीको सङ्ख्याका आधारमा कार्यक्रमको लागत र विस्तृत योजना तय गरिने व्यहोरासमेत अनुरोध छ । 

....................... 

महानिर्देशक

उत्तर:

श्री नेचासल्यान गाउँपालिका

सोलुखुम्बु ।

मिति : २०७७/१०/१३

प.स. : ०७७/०७८

च.नं. : ७५/०७७

पाठ्यक्रम विकास केन्द्र,

सानोठिमी, भक्तपुर ।

विषय: कार्यक्रम सञ्चालन सम्बन्धमा । 

पाठ्यक्रम विकास केन्द्रद्वारा स्थानीय तहसँगको सहकार्यमा विद्यालय पाठ्यक्रम तथा पाठ्पुस्तकसम्बन्धी अभिमुखीकरण प्रशिक्षण, तालिम, गोष्ठी, अन्तरक्रिया आदि कार्यक्रमहरू सञ्चालन गर्दै आएकोमा हार्दिक आभार व्यक्त गर्दछौं । हाम्रो यस श्री नेचासल्यान गाउँपालिका सोलुखुम्बुमा पनि यस्ता कार्यक्रम सञ्चालन गरी यहाँका विद्यालयहरूको शिक्षण सिकाइ उपलब्धिमूलक बनाउन अत्यन्त उत्साहित भएका छौं । यस गाउँपालिकाभित्र रहेका १२ ओटा सामुदायिक विद्यालयबाट करिव १५० जना शिक्षकहरूको सहभागितामा उक्त पाठ्यक्रम तथा पाठ्पुस्तकसम्बन्धी अभिमुखीकरण प्रशिक्षण तथा अन्तरक्रिया कार्यक्रम सञ्चालन गर्ने गाउँपालिका बोर्डको निर्णय भएको जानकारी गराउँदछौं । कार्यक्रमको लागत र विस्तृत योजना तय गरेपछि अवगत गराउनुहुने नै छ । सहयोगका लागि धन्यवाद ! 

..................

अध्यक्ष

६. दिइएको अनुच्छेदबाट चारओटा बुँदा टिपी एक तिहाइमा नबढ्ने गरी सारांश लेख्नुहोस् :

नेपालमा विविध प्रकारको हावापानी पाइन्छ । नेपालमा ऊष्ण मनसुनी, न्यानो समशीतोष्ण, ठन्डा समशीतोष्ण, लेकाली र हिमाली गरी मुख्यतः पाँच प्रकारको हावापानी पाइन्छ । समुद्री सतहदेखि १२०० मिटरसम्मको उचाइ पाइने हावापानीलाई ऊष्ण मनसुनी भनिन्छ । तराई, भावर, दुन र चुरे पर्वतको आसपासका क्षेत्रमा यो हावापानी पाइन्छ । यस क्षेत्रमा गर्मीमा औसत तापक्रम १५—४० डिग्री सेल्सियससम्म हुन्छ भने हिउँदमा १५—५ डिग्रीसम्म हुने गर्छ । वर्षामा सरदर २०० सेन्टिमिटरसम्म वर्षा हुन्छ । ग्रीष्म ऋतुमा तातो हावा ‘लु’ चल्छ । चुरे पहाड र महाभारत पर्वत क्षेत्रमा पाइने हावापानीलाई न्यानो समशीतोष्ण हावापानी भनिन्छ । समुद्री सतहबाट १२००—२१०० मिटरसम्मको क्षेत्रमा यो हावापानी पाइन्छ । ग्रीष्म ऋतुमा न्यानो र हिउँदमा भने निकै जाडो हुने यस हावापानीको विशेषता हो । ग्रीष्म ऋतुमा २४—३० डिग्री सेल्सियस र हिउँदमा ० डिग्री सेल्सियससम्म तापक्रम र १२५ सेन्टिमिटरसम्म वर्षा यस हावापानीको विशेषता हो । महाभारत पर्वतको उच्च भाग र हिमालको तल्लो भाग (२१००—३३०० मिटर) मा ठन्डा समशीतोष्ण हावापानी पाइन्छ । यस क्षेत्रमा तापक्रम १५—२० डिग्री सेल्सियस र जाडामा ० डिग्री सेल्सियसभन्दा तल र वर्षा १०० सेन्टिमिटरसम्म हुन्छ । हिउँदमा हिउँ पर्छ । हिमाली क्षेत्र (३३००—५००० मिटर) को शुष्क ठन्डा हावापानीलाई लेकाली हावापानी भनिन्छ । यो क्षेत्रमा गर्मीमा १०—१५ डिग्री सेल्सियससम्म तापक्रम पाइन्छ भने जाडामा ० डिग्री सेल्सियमभन्दा निकै तल पुग्छ । यहाँ करिब ४० सेन्टिमिटरसम्म वर्षा हुन्छ । समुद्र सतहबाट ५००० मिटरभन्दा माथिको उचाइमा रहेको उच्च हिमाली क्षेत्रमा पाइने हावापानीलाई हिमाली हावापानी भनिन्छ । यहाँको तापक्रम प्रायः ऋणात्मक हुन्छ । यहाँ वर्षाका रूपमा पनि हिउँ पर्छ । यहाँ मध्याह्नपछि हिउँको भीषण वर्षा हुन्छ ।

उत्तरः

बुँदाहरू:

१. नेपालमा पाँच प्रकारको हावापानी पाइनु,

२. तराई, मावर, दुन र चुरे पर्वतको आसपासमा उष्ण मनसुनी अनि चुरे पहाड र महाभारत पर्वत क्षेत्रमा न्यानो समशीतष्ण हावापानी पाइनु,

३. महाभारत पर्वतको उच्य भाग र हिमालको तल्लो भागमा ठण्डा समशीतोष्ण र हिमाली क्षेत्रमा शुष्क ठण्डा लेकाली हावापानी पाइनु,

४. उच्च हिमाली क्षेत्रमा ऋणात्मक तापक्रम हने हिमाली हावापानी पाइनु,

सारांश:

नेपालको हावापानी

नेपालमा ऊष्ण मनसुनी न्यानो समशीतोष्ण, ठग्य समशीतोष्णा, लेकाली र हिमाली गरी पाँच प्रकारको हावापानी पाइन्छ । तराई भावर, दुन र चुरे पर्वतको आसपासका क्षेत्रमा कृष्ण मनसुनी हावापानी पाइन्छ । चुरे पहाड र महाभारत पर्वत क्षेत्रमा न्यानो समशीतोष्ण हावापानी पाइन्छ । महाभारत पर्वतको उच्च आग र हिमलको तल्लो भागमा लण्डा समशीतोष्ण हावापानी पाइन्छ । हिमाली क्षेत्रमा तुम्क ठण्डा लेकाली हानामानी पाइन्छ । उच्च हिमाली क्षेत्रमा पाइने ऋणात्मक तापक्रम भएको हावापानीलाई हिमाली हावापानी भनिन्छ । 

• अनुच्छेदमा भएको शब्दसख्या : २२१
• एक तृतीयंशमा हुने सब्दसइख्या : ७३.६
• सारांशमा भएको शब्दसइख्या : ७३

७. दिइएको भरपाईको नमुना हेर्नुहोस् र नेपाल प्रज्ञा प्रतिष्ठानबाट कालिका पुस्तकालय, रसुवालाई उपहारस्वरूप प्रदान गरिएको बृहत् नेपाली शब्दकोश (दुई प्रति) त्यस पुस्तकालयका प्रमुखले बुझिलिएको भरपाईको नमुना तयार पार्नुहोस :

उतरः

भरपाई

भरपाई दादै नेपाल प्रज्ञा प्रतिम्सनबाट नेपाली भाषाको श्रीवृद्धिका लागि कालिका पुस्तकालय, रसुवालाई नेपाली भाषाप्रेमीको भाषिक शुद्धता एवं अर्थबोधमा सहजता होओस् भन्ने हेतुले प्रदान गरिएको बृहत् नेपाली शब्दकोश (दुई प्रति) निम्नानुसार बुझिलिएको भरपाई गरिदिएँ ।

बुझ्नेको नाम	पर	ठेगाना	हस्ताक्षर
राम प्रसाद शर्मा	पुस्तकालय प्रमुख	रसुवा, धुञ्चे

मिति : २०४७ चैत्र ४ गते बुधवार

८. दिइएको तमसुकको नमुना पठी तपाईंको आफ्नो स्थायी ठेगानाको कुनै एक व्यक्तिले त्यहाँको अर्को व्यक्तिसँग ऋण लिएको व्यहोरा खुलाई एउटा तमसुकको नमुना लेख्नुहोस् :

उत्तरः

तमसुक 

लिखितम् खोटाङ जिल्ला दिक्तेल रूपाकोट मझुवागढी नगरपालिका वडा नम्बर ६ नेर्पा, मोहोरिया टोल बस्ने शिवकुमारको नाति, दातारामको छोरा वर्ष ३७ को म जयप्रसाद पराजुलीले आफ्नो घरखर्च गर्न भनी ऐजन जिल्ला, ऐजन नगरपालिका, वडा नम्बर ११ खार्मी, ओडारे बस्ने छविलालको नाति, मधुलालको छोरा वर्ष ४० को तपाईँ गङ्गाराम दाहालबाट रु. ५०,०००।– (अक्षरेपि पचास हजार मात्र) आजैका मितिमा ऋण सापटी स्वरूप लिएको छु । यस रकमको वार्षिक आठ प्रतिशतका दरले ब्याज बुझाउने छु र दुई वर्षभित्रमा सम्पूर्ण सावाँ ब्याज चुक्ता गरिसक्ने छु । यदि यस कबोलअनुसार नबुझाएमा मेरो जायजेथा, घरजग्गाबाट कानुनबमोजिम असुल गरिलिन मेरो मन्जुरी छ । यो तमसुक मेरो राजीखुसीसाथ गरेको हुँ । व्यहोरा साँचो हो । झुठा ठहरे कानुनबमोजिम सहने बुझाउने छु । साक्षी किनारामा सदर । मुकाम साहुको घर आँगन । इति संवत् २०७८ साल वैशाख ५ गते रोज १ बार शुभम् ।

साक्षी 

..................खोटाङ जिल्ला दिक्तेल रूपाकोट मझुवागढी न.पा. वडा नम्बर ५ बस्ने वर्ष 

४५ को व्रतराज राई– १

.................. ऐ जिल्ला ऐ नगरपालिका वडा नम्बर ७ बस्ने गणपति सेढार्इँ – १ 

......................लेखक : ऐ.ऐ. वडा नम्बर ३ बस्ने जगत् खतिवडा 

आसामीको हस्ताक्षर :                                                                                                 औँठा         छाप 

                                                                                                                                 दायाँ         बायाँ

तमसुक

लिखितम् चितवन जिल्ला रत्ननगर नगरपालिका वडा नम्बर १३, चितवन, अमेलिया टोल बस्ने विष्णुप्रसादको नाति, कृष्णप्रसादको छोरा वर्ष १९ को म सुबर्ण पौडेलले आफ्नो घरखर्च गर्न भनी ऐजन जिल्ला ऐजन महानगरपालिका वडा नम्बर ४, नयाँबजार बस्ने छबिलालको नाति इश्वोरप्रसादको छोरा वर्ष ४० को तपाईं विशाल शर्माबाट रु. ५०,०००/- (अक्षरेपि पचास हजार मात्र) आजैका मितिमा ऋण सापटी स्वरुप लिएको छु । यस रकमको वार्षिक दश प्रतिशतका दरले ब्याज बुझाउने छु र पाँच वर्षभित्रमा सम्पूर्ण सावाँ ब्याज चुक्ता गरिसक्ने छु । यदि यस कबोलअनुसार नबुझाएमा मेरो जायजेथा, घरजग्गाबाट कानुनबमोजिम असुल गरिलिन मेरो मन्जुरी छ । यो तमसुक मेरो राजीखुसीसाथ गरेको हुँ । व्यहोरा साँचो हो । झुठा ठहरे कानुनबमोजिम सहने बुझाउने छु । साक्षी किनारामा सदरमुकाम साहुको घर आँगन । इति संवत् २०७८ साल मंसिर २० गते रोज १ बार शुभम् ।

साक्षी:

........................

चितवन जिल्ला रत्ननगर नगरपालिका वडा नम्बर १३ बस्ने वर्ष १९ को चिरन्जिबी पौडेल - १

........................

ऐजन जिल्ला ऐजन महानगरपालिका वडा नम्बर ४

बस्ने सुनिल शर्मा - १

........................

लेखक: ऐ.ऐ. वडा नम्बर ४ बस्ने रितेश शर्मा

आसामिको हस्ताक्षरः

........................

    औठा छापः

   दायाँ             बायाँ

९. दिइएको सम्झौता पत्र/करारनामाको नमुना पढ्नुहोस् र तपाईको विद्यालयमा पुस्तकालय भवन निर्माणका लागि विद्यालयका प्रधानाध्यापक, स्थानीय निर्माण कम्पनीका प्रमुखबिच गरिने करारनामाको नमुना लेख्नुहोस्:

कमलामाई नगरपालिका कार्यालय, सिन्धुली (यसपछि यहाँ पहिलो पक्ष भनिएको छ) र ऐजन जिल्ला, ऐजन नगरपालिका वडा नम्बर ७ निवासी श्री दयाराम उपाध्याय (यसपछि यहाँ दोस्रो पक्ष भनिएको छ) सँग तपसिलका कार्य गर्नका लागि देहायबमोजिमको सर्तको अधीनमा रहेर दोस्रो पक्षले पहिलो पक्षलाई सेवा उपलब्ध गराउन मञ्जुर भई यो सम्झौता गरिएको छ । यो सम्झौताका एक एकप्रति आपसमा बुझिलियौँ, दियौँ ।

सर्तहरू 

१. गर्नुपर्ने कामको विवरण: दोस्रो पक्षले कमलामाई नगरपालिका वडा न. ७ को वडा  कार्यालयका तोकिएका कार्य कार्यालय सहयोगीका रूपमा गर्नुपर्ने छ । कार्यालयको कामका सिलसिलामा आवश्यक परेमा सार्वजनिक बिदाका दिनमा र कार्यालय समयका अतिरिक्त समयमा समेत काम गर्नुपर्ने छ । 

२. दोस्रो पक्षले सेवासम्बन्धी प्रचलित कानुनमा व्यवस्था भएका आचरणसम्बन्धी कुरा पालना गर्नुपर्ने छ । 

३ पारिश्रमिक : मासिक पारिश्रमिक पहिलो पक्षले दोस्रो पक्षलाई महिना समाप्त भएसँगै  मासिक रु. १३,५००।– (तेर हजार पाँच सय मात्र) भुक्तानी दिने छ । 

४. सम्झौता भङ्ग गर्न चाहेमा कम्तीमा १५ दिनको समय दिई एक पक्षले अर्को पक्षलाई लिखित रूपमा सूचना दिनुपर्ने छ । 

५. दोस्रो पक्षले कार्यालय प्रमुखको स्वीकृतिमा प्रत्येक महिनामा १ (एक) दिन बिदा लिन सक्ने छ । यस्तो बिदा अर्को आर्थिक वर्षका लागि सञ्चित हुने छैन । 

६. पहिलो पक्षले दोस्रो पक्षलाई चाडपर्व खर्च एक महिनाको तलब बराबरको रकम उपलब्ध गराइने छ । 

७. सम्झौताको अवधि २०७८ साल साउन १ गतेदेखि २०७९ असार मसान्तसम्म एक वर्षको हुने छ ।

पहिलो पक्षबाट                                            दोस्रो पक्षको तर्फबाट 

दस्तखत:                                                     दस्तखत:

नाम थर: ....................                                 नाम थर: दयाराम उपाध्याय 

ठेगाना: कमलामाई नगरपालिका कार्यालय     ठेगाना: कमलामाई न.पा. वडा नम्बर ७, सिन्धुली

पद: प्रमुख प्रशासकीय अधिकृत                     पद: कार्यालय सहयोगी 

कार्यालय: कमलामाई नगरपालिका नगर कार्यपालिकाको कार्यालय 

रोहबर वडा अध्यक्ष .......................

श्री वडा सचिव .............................

श्री कमलामाई नगरपालिका वडा नम्बर .................. वडा कार्यालय, सिन्धुली 

इति संवत् २०७८ साल साउन १ गते ६ रोज शुभम

उत्तर:

सम्झौता पत्र / करारनामा

खड्गकाली माध्यमिक विद्यालय, चापाकोट-४, स्याङ्जा र ऐजन जिल्ला ऐजन नगरपालिका वडा नम्बर १३ निवासी श्री अर्जुन पौडेलसँग तपसिलका कार्य गर्नका लागि देहायबमोजिमको सतको अधीनमा रहेर दोसों पक्षले पहिलो पक्षलाई सेवा उपलब्ध गराउन मजुर भई यो सम्झौता गरिएको छ । यो सम्झौताका एक एकप्तति आपसमा बुझिलियौँ दियौँ ।

सर्तहरू

१. गर्नुपर्ने कामको विवरण : दोस्रो पक्षले खड्गकाली माध्यमिक विद्यालय, चापाकोट-४, स्याङ्जामा पुस्तकालय भवन निर्माण कार्य गर्नुपर्ने छ । उक्त भवन निर्माणकार्य चापाकोट नगरपालिकाबाट प्राप्त लागत, विवरण र डिजाइन अनुसार गर्नुपर्ने छ ।

२. दोस्रो पक्षले प्रचलित कानुनमा व्यवस्था भएका भवन निर्माणसम्बन्धी सम्पूर्ण नियमहरू पालना गर्नुपर्ने छ ।

३. भुक्तानी : नगरपालिकाबाट प्राप्त लागत, विवरण र डिजाइन अनुसार निर्माण कार्य सम्पन्न भइ सम्पूर्ण कागजात नगरपालिकामा पेश गरेपछि

नियमबमोजिम एक महिनाभित्र रकम भुक्तानी गरिनेछ ।

४. धरौटी : कुल लागत विवरणमा उल्लेख भएको रकमको १० प्रतिशतका दरले हुन आउने रकम विद्यालयको नेपाल बैंक लिमिटेडमा रहेको खाता

नं. १३२००००००५ मा जम्मा गर्नुपर्ने छ ।

५. सम्झौता भंग गर्न चाहेमा कम्तीमा १५ दिनको समय दिई एक पक्षले अर्को पक्षलाई लिखित रूपमा सूचना दिनुपर्ने छ ।

६. सम्झौताको अवधि २०७९ साल वैशाख १ गतेदेखि २०८० चैत्र मसान्तसम्म एक वर्षको हुने छ ।

पहिलो पक्षबाट	दोस्रो पक्षबाट
दस्तरखत: .............	दस्तरखत: ..............
नाम थर : रितेश श्रेष्ठ	नाम थर: विशाल पौडेल
ठेगाना: चापाकोट-४, घुर्लिचौर, स्याङ्जा	ठेगाना: चापाकोट-४, घुर्लिचौर, स्याङ्जा
पद: प्रधानाध्यापक	पद: प्रबन्ध निर्देशक
कार्यालय: श्री खड्गकाली मा.वि. चापाकोट-४, घुर्लिचौर, स्याङ्जा	कार्यालय: चितवन निर्माण प्रा. लि., रत्ननगर, रत्ननगर-२, चितवन

रोहबर वडा अध्यक्ष : ................

श्री वडा सचिव : .................

श्री रत्ननगर नगरपालिका वडा नम्बर .... वडा कार्यालय, चितवन ।

इति संवत् २०७९ साल वैशाख १ गते रोज शुभम् ।

१०. दिइएको मन्जुरीनामाको नमुना पढ्नुहोस् र तपाईंको जग्गामा रहेको ढुङ्गाखानीबाट तपाईको टोलमा सार्वजनिक शौचालय निर्माणका लागि चाहिने ढुङ्गा निकाली लैजानका लागि तपाईले वडा कार्यालयलाई दिएको मन्जुरीनामाको नमुना लेख्नुहोस् ।

श्रीमान् कार्यालय प्रमुख

राजर्षि जनक अध्ययन अनुसन्धान प्रतिष्ठान

जनकपुर, धनुषा ।

विषय: मन्जुरीनामा सम्बन्धमा ।

मैले त्यस प्रतिष्ठानबाट ‘मैथिली समाजको विवाह परम्परा’ विषयमा अनुसन्धान पूरा गरी सोको प्रतिवेदनसमेत बुझाइसकेको छु । यस अनुसन्धानबापत मैले पाउने पारिश्रमिकको दोस्रो तथा अन्तिम किस्ता रकम भुक्तानी हुन बाँकी छ । हाल म मेरो घरायसी कामको चापले गर्दा त्यहाँ कार्यालयमा आई उक्त पारिश्रमिक बुझ्न असमर्थ भएकाले सो पारिश्रमिक बुझी लिनका लागि सिरहा जिल्ला, मिर्चैया नगरपालिका वडा नम्बर ७ स्थायी ठेगाना भई हाल त्यही अनुसन्धान प्रतिष्ठानमा अनुसन्धाताका रूपमा कार्यरत श्री दिनेश भगतलाई मन्जुरीनामा दिएको छु । मैले पाउने उक्त पारिश्रमिकबापतको रकम निज दिनेश भगतलाई उपलब्ध गराइदिनसमेत अनुरोध गर्दछु । व्यहोरा साँचो हो, झुठा ठहरे कानुनबमोजिम सहँुला बुझाउँला । इति मिति २०७८ वैशाख ७ गते मङ्गलबार ।

भवदीय

सही:.............. 

जयेश्वर साह

उत्तरः

श्रीमान् वडाध्यक्ष,

रत्ननगर चापाकोट-४,

घर्लिचौर, स्याङ्जा ।

विषय : मन्जुरीनामा सम्बन्धमा ।

उपर्युक्त सम्बन्धमा म चितवन नगरपालिका वडा नं. २ निवासी स्थायी बासिन्दा हूँ । यस वडामा सार्वजनिक शौचालयको अभाव भएको कारण सार्वजनिक स्थलहरूमा खुला दिसा पिसाब गर्ने गरिएको छ, जसका कारण वडा नै दुर्गन्धित हुँदै गएको अवस्था छ । यस वडाले हाम्रो टोलमा सार्वजनिक शौचालय निर्माणका लागि ढुङ्गाको अभाव भएको तथ्यलाई मनन गर्दै मेरो जग्गामा रहको ढुङ्गाखानीबाट हामो टोलमा सार्वजनिक शौचालय निर्माणका लागि चाहिने आवश्यक दुङ्गा निकाली लैजानका लागि मैले र. न.पा. ४ को वडा कार्यालयलाई राजीखुसीका साथ मन्जुरीनामा दिएको छ । व्यहोरा साँचो हो, झुठा ठहरे कानुनबमोजिम सहला बुझाउँला । 

इति मिति २००८ मसिर ०८ गते बुधवार । 

भवदीय 

सही: ........................

हसान खाँण

११. दिइएको विज्ञापनको नमुना पढ्नुहोस् र नमुनामा जस्तै कुनै पदको पूर्ति तथा कुनै सामानको प्रचारप्रसारका बारेमा एक एकओटा विज्ञापन लेख्नुहोस्:

ज्योति माध्यमिक विद्यालयको

आवश्यकतासम्बन्धी

सूचना

(पहिलो पटक प्रकाशित मिति: २०७८/०१/११)

यस विद्यालयमा रिक्त रहेको नेपाली विषयको माध्यमिक तृतीय श्रेणी शिक्षक पदमा खुला प्रतियोगिताद्वारा करार सेवामा शिक्षक पदपूर्ति गर्नुपर्ने भएकाले यो सूचना प्रकाशन गरिएको छ । योग्यता पुगेका नेपाली नागरिकबाट यो सूचना प्रकाशन भएको मितिले ३५ (पैँतिस) दिनभित्र दरखास्त आह्वान गरिएको छ । उक्त मितिबाट सात दिनसम्म दोब्बर दस्तुर तिरी दरखास्त दिन सकिने छ ।

दरखास्तका साथ पासपोर्ट साइजको फोटो दुई प्रति, शैक्षिक योग्यताको प्रमाण पत्र तथा नागरिकताको प्रमाण पत्रका प्रमाणित प्रतिलिपि पेस गर्नुपर्ने छ । दरखास्त दस्तुर रु. १०००।– (अक्षरेपि एक हजार रुपियाँ) यस विद्यालयको नेपाल बैङ्क लिमिटेड, कान्तिपथ शाखामा रहेको च.हि.न १००००००००००००००००००१ मा जम्मा गरी त्यसको सक्कल भौचर संलग्न गर्नुपर्ने छ ।

विज्ञापन नं.: २/२०७७/०७८

पद: तृतीय श्रेणी

तह: माध्यमिक

विषय: नेपाली

परीक्षाको किसिम: लिखित तथा अन्तर्वार्ता

आवश्यक न्यूनतम योग्यता: सम्बन्धित विषयमा कम्तीमा स्नातक तह उत्तीर्ण 

सम्पर्क मिति: २०७८/०२/२१ गते 

................................

प्रधानाध्यापक

व्यावसायिक विज्ञापन

प्रदूषणरहित समाजको परिकल्पना र स्वस्थ जीवनको कामनाका साथ राप्ती यातायात सेवाद्वारा सञ्चालित विशेष सुविधासहितको

बिजुली बस आरामदायी सिट

वातानुकूलित सुविधा

निःशुल्क वाइफाई सेवा

विद्यार्थीका निम्ति विशेष सहुलियत

भिडिओ तथा शौचालयको सुविधा

चियाखाजाको निःशुल्क व्यवस्था

बिजुली बसमा यात्रा गर्नुहोस् र आफू स्वस्थ बन्नुहोस् तथा वातावरणलाई पनि स्वस्थ राख्नुहोस् ।

राप्ती यातायात सेवा

दाङ

फोन ०८२–५२४०००

१२. दिइएको सूचनाको नमुना पढ्नुहोस् र नयाँ वर्षका दिन १२ कक्षाका सबै विद्यार्थी एक दिने शैक्षिक भ्रमण जाने विषयमा विद्यालयका प्रधानाध्यापकबाट जारी गरिने सूचनाको नमुना लेख्नुहोस् :

लुम्बिनी कविता महोत्सवसम्बन्धी सूचना !

लुम्बिनी साहित्य समाज, कपिलवस्तुको आयोजनामा आगामी २०७८ असार १० गतेदेखि १२ गतेसम्म तौलिहवामा त्रिदिवसीय कविता महोत्सव सम्पन्न गरिने भएकाले इच्छुक सहभागीले जेठ ५ गतेभित्र आआफ्ना कविता यस समाजको कार्यालयमा उपलब्ध गराइदिनुहुन र साहित्यप्रेमी सबैलाई कविता महोत्सव समारोहमा उपस्थित भई कविताको रसास्वादन गर्नुहुन यही सूचनामार्फत सादर अनुरोध गरिन्छ ।

कार्यक्रम 

मिति: २०७८ असार १० गतेदेखि १२ गतेसम्म 

कविता दर्ता गर्ने अन्तिम मिति: २०७८ असार ५ गते

आयोजक

लुम्बिनी साहित्य समाज, कपिलवस्त

१३. दिइएको बोलपत्रको नमुना पढ्नुहोस् र तपाईँको विद्यालयमा छात्रावास भवन बनाउनका लागि जारी गरिने बोलपत्रको नमुना लेख्नुहोस् :

त्रिभुवन विश्वविद्यालय

रेसुङ्गा क्याम्पस, गुल्मी

अनुसन्धानमूलक पत्रिका छपाइसम्बन्धी सिलबन्दी बोलपत्र आह्वानको सूचना

(प्रथम पटक प्रकाशन मितिः (२०७८/०४/१० गते)

यस क्याम्पसको प्राज्ञिक तथा अनुसन्धान विभागबाट हरेक तीन तीन महिनामा ‘रुरु अनुसन्धान पत्रिका’ प्रकाशन गर्नुपर्ने भएकाले नेपाल सरकारबाट इजाजत प्राप्त प्रकाशन फर्म/कम्पनी/संस्थाले तपसिलबमोजिमको सर्तको अधीनमा रही रितपूर्वकको बोलपत्र पेस गर्नुहुन यो सूचना प्रकाशन गरिएको छ ।

१. यो सूचना प्रकाशित मितिदेखि ३० औँ दिनसम्म बोलपत्र फाराम यस क्याम्पसको आर्थिक प्रशासन शाखाबाट प्राप्त गर्न सकिने छ । 

२. खरिद गरिएका बोलपत्र फारामका महल स्पष्ट रूपमा भरी प्रत्येक पानामा सहीछाप गरी प्रथम पटक सूचना प्रकाशन भएको मितिदेखि ३५ औँ दिन दिनको १२ बजेभित्र यस कार्यालयमा उपस्थित भई वा बोलपत्र र आवश्यक कागजातको स्क्यान गरी अनलाइनमार्फत दर्ता गर्नुपर्ने छ ।

३. बोलपत्रका साथ सम्बन्धित व्यक्तिको नागरिकता, अद्यावधिक नवीकरण गरेको व्यवसाय दर्ताको इजाजतपत्र, अद्यावधिक नवीकरण पत्र, संस्था वा कम्पनी दर्ताको प्रमाणपत्र, मूल्य अभिवृद्धि करमा दर्ताको प्रमाणपत्र, स्थायी लेखा नम्बरको प्रमाणपत्र, आ. व. ०७६ सम्मको कर चुक्ता गरेको कागजातका प्रमाणित प्रति पेस पेस गर्नुपर्ने छ । 

४. बोलपत्र फारामसाथ जमानतबापतको रकम यस क्याम्पसको नाममा रहेको राष्ट्रिय वाणिज्य बैङ्क, चल्ती खाता नम्बर १००००००००००००००१ मा एकमुष्ट दाखिला गरेको सक्कल भौचर पेस गर्नुपर्ने छ । 

५. दर्ता हुन आएका सिलबन्दी तथा अनलाइनमा दर्ता भएका बोलपत्र फाराम ३६ औँ दिन दिनको ३.०० बजे यस कार्यालयमा नियमपूर्वक खोलिने छ । 

६. बोलपत्र फाराम खरिद गर्ने वा दाखिला गर्ने दिन सार्वजनिक बिदा परेमा बिदापछिको कार्यालय खुलेको दिन सोही समयमा उक्त कार्य हुने छ । 

७. प्राप्त बोलपत्र स्वीकृत गर्ने वा नगर्ने सम्पूर्ण अधिकार यस कार्यालयमा सुरक्षित रहने छ । 

८. रित नपुगेका र म्याद नाघिआएका बोलपत्रउपर कुनै कारबाही गरिने छैन । 

९. बोलपत्रसम्बन्धी अन्य सर्त बोलपत्र फाराममा उल्लेख गरेबमोजिम हुने छन् । 

१०. अन्य कार्यविधि त्रिभुवन विश्वविद्यालय तथा नेपाल सरकारका आर्थिक प्रशासनसम्बन्धी ऐन तथा नियमावलीअनुसार हुने छ । 

११. थप जानकारीका लागि यस क्याम्पसको कार्यालयमा सम्पर्क गर्न सकिने छ ।क्याम्पस प्रमुख

१४. दिइएका कार्यालयमा प्रयोग हुने टिप्पणी र आदेशको नमुना पढ्नुहोस् र तपाईँ कुनै कार्यालयमा गई टिप्पणी र आदेशका थप नमुना खोजेर ल्याई त्यहीअनुसार टिप्पणी लेख्ने अभ्यास गर्नुहोस्:

पूर्वाधार विकास कार्यालय

गाईघाट, उदयपुर

मिति: २०७७/०८/३१

टिप्पणी र आदेश

 

श्रीमान कार्यालय प्रमुख

विषय: दरभाउपत्र स्वीकृति सम्बन्धमा । 

यस कार्यालयको स्वीकृत कार्यव्अनुसार जिल्ला उदयपुर त्रियुगा नगरपालिका वडा न. ५ अन्तर्गतका सडक ग्राभेल तथा ह्युम पाइप निर्माण गर्नुपर्ने सन्दर्भ जानकारीका लागि अनुरोध छ । यस कार्यालयको मौजुदा सूचीमा रहेका निर्माण कम्पनीबाट सात दिनभित्र दररेट पेस गर्न यस कार्यालयको मिति २०७७/०७/०५ गतेको पत्रबाट माग गरिएबमोजिम सात दिनको अवधिभित्र यस कार्यालयमा तपसिलअनुसारका दरभाउपत्र पेस भएको पाइयो ।

सि.न.	निर्माण कम्पनीको नाम	लागत अनुमान	पेस गरेको कबोल अङ्क	कैफियत
१.	चाम्लिङ निर्माण सेवा, त्रियुगा न.पा.७, उदयपुर	४,९०,०००।–	४,८५,०००।–	–१.०२%
२.	पञ्चमी निर्माण सेवा चौदण्डीगढी न.पा. ४, बेल्टार, उदयपुर		४,८४,०००।–	–१.२२%
३.	रूपाटार निर्माण सेवा कटारी नपा.२, उदयपुर			–०.८२%

माथि पेस भएका निर्माण कम्पनीहरूको तुलनात्मक अध्ययन गर्दा सबैभन्दा कम लागत अनुमान प्रस्ताव गर्ने पञ्चमी निर्माण सेवा चौदण्डीगढी न.पा. ४, बेल्टार, उदयपुरले उक्त निर्माण कार्य रु. ४,८४,०००।– (अक्षरेपि चार लाख चौरासी हजार मात्र) मा सम्पन्न गर्नेगरी कबोल अङ्क पेस गरेको र उक्त अङ्क लगत इस्टिमेट रु ४,९०,०००।– (अक्षरेपि चार लाख नब्बे हजार मात्र) (मूल्य अभिवृद्धि करसमेत) भन्दा १.२२% घटी रहेकाले सार्वजनिक खरिद नियमावली २०६४ को नियम ८५ को उपनियम (१) बमोजिम दरभाउ पत्र स्वीकृत गरी उक्त निर्माण कम्पनीलाई माथि उल्लेख भएबमोमिको निर्माण कार्य सम्पन्न गर्ने गरी कार्यादेश दिन मनासिब देखिएकाले आवश्यक निर्णायार्थ पेस गरेको छु ।

पेस गर्ने

हस्ताक्षर ........

तुलसी सुवेदी

शाखा अधिकृत

निर्णय तथा आदेश

पेस हुन आएको टिप्पणी मनासिब देखिएकाले टिप्पणीमा उल्लेख भएअनुसार दरभाउ पत्र  स्वीकृत गरी निर्माण कार्य सम्पन्न गर्नका लागि कार्यादेश दिइएको छ । 

हस्ताक्षर

 ............................

जगदीश यादव

मिति: २०७७/०९/०३

कार्यालय प्रमुख

१५. दिइएको ‘सम्पादकलाई चिठी’ को नमुना पढ्नुहोस् र यस्तै कुनै समसामयिक समस्यामूलक विषयमा आधारित भएर सम्बद्ध पक्षको ध्यानाकर्षण गराउन कुनै राष्ट्रिय दैनिक पत्रिकाका सम्पादकलाई चिठी लेख्नुहोस्:

मिति: २०७८/०१/११

श्रीमान् सम्पादक

गोरखापत्र राष्ट्रिय दैनिक

धर्मपथ, काठमाडौँ ।

विषय: ध्यानाकर्षण सम्बन्धमा ।

गोरखापत्रका हालसालैका अङ्कमा बढ्दो प्रदूषण र यसले निम्त्याएका समस्या पढ्नुपर्दा पढ्ने सुन्ने सबैलाई पीडा हुनु स्वाभाविकै हो । विश्वव्यापी रूपमा बढिरेहको प्रदूषणले पृथ्वीको जलवायुमा प्रत्यक्ष रूपमा असर पारेको छ । फोक्सोका रोगी बढेका छन् । अहिले विश्वव्यापी रूपमा देखा परेको कोरोना भाइरसको सङ्क्रमण तीव्र रूपमा फैलनुमा पनि प्रदूषणले केही सघाएको चिकित्सकको ठम्याइ छ । प्रदूषणका कारण फोक्सोको प्रतिरोधात्मक क्षमता कमजोर भएकाले कोरोनाबाट सङ्व्रmमित भएका धेरै मानिसको मृत्यु भएको आँकलन चिकित्सकले गरेका छन् । यस्तै प्रदूषणले गर्दा पृथ्वीको तापमान अनपेक्षित रूपमा बढेको छ । केही दिन पहिले बढेको प्रदूषणका कारण नेपालमा केही दिन विद्यालय नै बन्द गर्नु परेको पीडा हामी सबैले भोगिसकेका छौँ । अहिले प्रदूषण व्यक्तिगत र राष्ट्रिय मात्र नभएर विश्वकै समस्या बनेको छ । मूलतः सवारी साधन, कलकारखाना र विभिन्न समयमा हुने आगलागीबाट उत्सर्जन हुने गरेको कार्बन डाइअक्साइड नै प्रदूषणको प्रमुख कारक बनेको देखिएको छ । यसैले अहिले हरेक देशले प्रदूषणका यी कारणलाई मध्यनजर राखी यसको समाधानमा अग्रसर हुनुपरेको छ । यसका लागि पेट्रोल र डिजलबाट चल्ने सवारी साधनका सट्टामा विद्युतीय सवारी साधनको प्रयोग गर्न अग्रसर हुनुपर्ने देखिन्छ । यस्तै बढ्दो वनविनाशलाई न्यूनीकरण गर्दै वृक्षरोपणका माध्यमबाट कार्बन डाइअक्साइडको न्यूनीकरण गर्न सकिन्छ । आगो लागिसकेपछि इनार खन्ने प्रवृत्तिको अन्त्य गरी आगलागी हुनै नदिन अपनाउनुपर्ने उपायबारे सबै समयमै जानकार हुनुका साथै तदनुरूपको कार्ययोजना ल्याई अघि बढ्न जरुरी छ । हामी सबैले यी उपाय अपनायौँ भने पक्कै पनि प्रदूषण कम हुन्छ र अहिले विश्वव्यापी रूपमा देखा परेको कोरोना भाइरसको नियन्त्रणमा समेत सहयोग पुग्ने छ भन्ने मेरो विश्वास छ । यसैले यससम्बन्धी सामग्रीको प्रकाशन गरेर सबैलाई सचेत र जागरुक बन्ने प्रेरणा यस पत्रिकाले दिने छ भन्नेमा म विश्वस्त छु, धन्यवाद ।

भवदीय

शिव पोखरेल

कीर्तिपुर २, ट्याङ्लाफाँट

१६. नेपाल सरकारका विभिन्न मन्त्रालय, विभाग, कार्यालयका वेबसाइट हेर्नुहोस् र तिनमा प्रकाशित सूचना, विज्ञापन, बोलपत्र, करारनामाको नमुना खोजेर कक्षामा प्रस्तुत गर्नुहोस् । 

सुनाइ र बोलाइ 

१. सुनाइ पाठ ४ सुन्नुहोस् र दिइएका प्रश्नको मौखिक उत्तर दिनुहोस्:

(क) बादलका टुक्राले के गरिरहेका छन् ? 

(ख) लेखकका लागि उनी लुगा किन वर्जित छ ? 

(ग) लेखकले जाडोलाई कसरी सामना गरे ? 

(घ) शारीरिक परिश्रमबाट लेखकलाई कस्तो प्रभाव परेको छ ? 

२. तपाईँलाई कस्तो मौसम मन पर्छ, सुनाइ पाठ ४ का आधारमा भन्नुहोस् । 

भाषातत्व 

१. उदाहरणअनुसार सरल वाक्यलाई मिश्र वाक्यमा परिवर्तन गर्नुहोस्:

सरल वाक्य	मिश्र वाक्य
हावा चल्यो । जाडो भयो ।	जब हावा चल्यो तब जाडो भयो ।
तिमी राम्रो पढ । तिमी सफल हुन्छौ ।	राम्रो पढ्यौ भने सफल हुन्छौ ।
किताब बजारमा आयो । म किताब पढ्छु ।	......................................
पानी प¥यो । बाटो हिलो भयो ।	.....................................
उसले परिश्रम ग¥यो । उसले मिठो फल पायो ।	......................................
नेपाल सुन्दर छ । संसारलाई थाहा छ ।	......................................
वातावरण प्रदूषण बढ्छ । महामारीको खतरा हुन्छ ।	......................................

२. उदाहरणमा दिए जस्तै सरल वाक्यलाई संयुक्त वाक्यमा परिवर्तन गर्नुहोस्:

सरल वाक्य	संयुक्त वाक्य
हावा चल्यो । जाडो भयो ।	हावा चल्यो अनि जाडो भयो ।
म कविता लेख्छु । म गीत गाउँछु । म चित्र कोर्छु । म विद्यालयमा पढाउँछु ।	म कविता लेख्छु, गीत गाउँछु, चित्र कोर्छु र विद्यालयमा पढाउँछु ।
किताब बजारमा आयो । मैले किताब किने ।	......................................
पानी पर्‍यो । बाटो हिलो भयो ।	.....................................
उसले मह काढ्यो । उसले हात चाट्यो ।	......................................
तिमी सौराहा जाऊ । तिमी हात्तीमा चढ । तिमी जङ्गल घुम । तिमीले जङ्गलमा गैँडा देख्ने छौ ।	......................................
हामी नेपाली हौँ । हामी स्वाभिमानी छौँ । हामी स्वावलम्बी छौँ । समृद्ध नेपाल र सुखी नेपाली हाम्रो चाहना हो ।	......................................

३. सरल वाक्यमा परिवर्तन गरी दिइएको अनुच्छेद पुनर्लेखन गर्नुहोस्:

धेरै पहिले हलेसी धाम रहेको ठाउँमा घना जङ्गल थियो । त्यहाँ अनेक जङ्गली जनावर थिए । किंवदन्तीअनुसार धेरै अगाडि हलेसी गैरीगुठका वाग्वंशी राई आफ्नो कुकुर र केही साथी लिएर सिकार खेल्दै हलेसी महादेव गुफाको छेउमा पुगेछन् । त्यो अनकन्टार जङ्गलमा एउटा सुन्दर मृग देखापरेछ र वाग्वंशीको कुकुरले त्यो मृगलाई लखेट्न लागेछ । वाग्वंशी पनि कुकुरका पछि दौडिँदै गएछन्, जाँदा जाँदा मृग र कुकुर दुवै जमिनभित्र हराएछन् अनि कुकुर भुकेको आवाज चाहिँ सुनिने तर कुकुर चाहिँ नदेखिने भएछ । रात पनि पर्न लागेकाले वाग्वंशी घर फर्केछन् र खाना खाएर सुतेछन् । भोलिपल्ट उनी केही साथीसमेत भएर पुनः त्यही ठाउँमा आएर कुकुरका पाइलाको डोब पत्ता लगाउँदै र झाडी फाँड्दै गएछन् । जमिनमुनि एउटा डर लाग्दो गुफा फेला पारेछन् । वाग्वंशीले जे त पर्ला भनेर साथीको सहयोगमा डोरीको सहायताले गुफाभित्र हाम फालेछन् र गुफाभित्र पुग्दा त झिलिमिली उज्यालो रहेछ । त्यहाँ त शिवपार्वती आफ्ना प्रमथगणसहित आनन्दले बसेका रहेछन् । वाग्वंशीले शिवपार्वतीलाई प्रणाम गरी गुफाबाहिर आएछन् । त्यसपछि त्यस गुफाको प्रचारप्रसार भएछ, थुप्रै मानिस भेला भएर गुफाभित्र छिर्ने बाटो बनाई भित्र गएछन् । भित्र जाँदा त शिवपार्वती अन्तध्र्यान भएका रहेछन्, त्यहाँ त उनीहरूका मूर्ति पो रहेछन् र यसपछि त्यहाँ शिवको पूजा आराधना गर्न थालिएको रहेछ ।

४. मिश्र वाक्यको प्रयोग गरी तपाईँले एक दिनअघि गरेका कामको बयान गर्नुहोस् । 

५. संयुक्त वाक्यको प्रयोग गरी आफ्नो मिल्ने साथीको परिचय दिनुहोस् । 

६. सरल, मिश्र र संयुक्त तीनै प्रकारका वाक्यको प्रयोग गरी आफ्नो जीवनको लक्ष्य बारे लेख्नुहोस् ।

७. ‘य’ र ‘ए’ को प्रयोग भएका शब्दलाई अलग अलग सूचीमा देखाउनुहोस्:

एक, वायु, अनुयायी, एघार, एकतिस, एकाउन्न, यही, यसो, गए, एकता, एकाग्र, यस्तो, यस, त्यस, एकादशी, योग्य, पेय, शिष्य, दृश्य, हास्य, कार्य, वाक्य, गद्य, पद्य, रमणीय, कर्तव्य, धैर्य, जय, वाणिज्य, सौर्य, सौन्दर्य, राष्ट्रिय, एकान्त, लाएँ, लायौँ, खाएँ, देखाएँ, पढायौँ, पढाएँ, दिएँ, मुख्य, मनुष्य, जलमय, अन्नमय, यज्ञ, भय, भए, लिए, दिएर, एकचालिस, एकान्त, एकसरो, हिमालय, यता, यति, त्यस्तो, गए, खाए, आए, बयर, घायल, टायम, डायरी, डायल, कायल, मध्ये (alert-warning)

८. ‘य’ र ‘ए’ प्रयोग भएका दश दशओटा शब्दको प्रयोग गरी साथीलाई चिठी लेख्नुहोस् ।

सिर्जना र परियोजना कार्य 

१. तपाईँले चिनेजानेको कुनै व्यापारिक निकायमा सम्पर्क राखी त्यहाँबाट अरूलाई पठाइएका र अरूले त्यस निकायमा पठाएका पत्र देखाउन अनुरोध गर्नुहोस् र ती पत्रको ढाँचामा पाइने समानता र भिन्नता लेखेर ल्याई कक्षामा प्रस्तुत गर्नुहोस् ।

उत्तर: यी कृयाकलापहरु वैयक्तिक रुपमा फरक हुने भएकाले अनावश्यक ठानी राखिएको छैन । कृपया शिक्षकको सहयोगमा यो कृयाकलाप स्वयंले गर्नुहोला । (alert-warning)

२. कक्षाका विद्यार्थीहरू भरपाई, तमसुक, करारनामा, मञ्जुरीनामा र बोलपत्र समूह बनाउनुहोस् र समूहका सदस्यहरू सम्बन्धित व्यक्ति, संस्था, कार्यालयमा सम्पर्क राखी वा सम्बन्धित संस्थाको वेबसाइट अध्ययन गरी आआफ्नो समूह नामअनुसारको लेखनका नमुना सङ्कलन गर्नुहोस् । सङ्कलित सामग्रीलाई समूहगत रूपमा कक्षामा प्रस्तुत गर्नुहोस् । कक्षामा प्रस्तुत भएका नमुनाका आधारमा हरेक लेखनका थप नमुना लेख्नुहोस् ।

उत्तर: यी कृयाकलापहरु वैयक्तिक रुपमा फरक हुने भएकाले अनावश्यक ठानी राखिएको छैन । कृपया शिक्षकको सहयोगमा यो कृयाकलाप स्वयंले गर्नुहोला । (alert-warning)

Credit: Puspa Shrestha (This notes were prepared with the help of Puspa Shrestha's blog. Please visit Puspa Shrestha's blog for viewing other awesome guides.) (alert-success)

• Previous Lesson: पाठ ४: व्यावसायिक पत्र (नेपाली कक्षा १२)
• Next Lesson: पाठ ५: एक चिहान - हृदयचन्द्रसिंह प्रधान (नेपाली कक्षा १२)